Heildartala yfir síðuflettingar

fimmtudagur, 19. apríl 2018

Prjónaveski

 
Ég er öll fyrir skipulagið. 
Búin að sauma mér nokkrar verkefnatöskur fyrir prjónadótið, þar sem ég set allt sem ég þarf í eitt verkefni, allt garnið og alla prjóna sem þarf að nota.
En fyrir nokkrum dögum pantaði ég snið af þessu bráðsniðuga veski fyrir prjónana sjálfa. Þarna má líka setja skæri og prjónamát.
Efnin sem ég notaði voru keypt í Storkinum, og eru frá Kaffe Fasset og Amy Butler.
 
Höfundur veskisins er bloggarinn Timotei, tengill á bloggið hennar er hér til hliðar á síðunni minni. 
Hún er mikil handavinnukona, saumar og prjónar, og hefur hannað nokkur snið sem eru til sölu í Epla búðinni hennar.
 

miðvikudagur, 11. apríl 2018

Lítil budda

 
Mér finnst gaman að gera buddur og töskur.
 
 
Uppskriftina af þessari sá ég bara á myndum einhvers staðar á netinu, man ekkert hvar, og það stendur ekkert á uppskriftinni.
 
 
Aðferðin er skemmtileg, og mjög einföld.
 
 
Ég nota hana fyrir það sem ég þarf alltaf að hafa á mér þegar ég fer úr húsi, og set hana með öllu dótinu í þá tösku sem hentar hverju sinni.
Mjög praktískt.
 
 
Ég læt fylgja myndakennsluna sem ég fór eftir, ef einhvern langar til að prófa.

fimmtudagur, 22. mars 2018

Litla könglahúfan


Ég er búin að eiga uppskriftina af þessum húfum í dálítinn tíma, og ákvað að nú væri rétti tíminn til að prjóna þær. Reyndar ætlaði ég að vera búin með þær fyrir um mánuði síðan, en þurfti að bíð eftir garninu.
Mér fannst tímabært að ömmustelpurnar, komnar hátt á þriðja ár, fengju húfur fyrir stórar stelpur, sem ekki þyrfti að binda undir hökunni.

Uppskriftin gefur upp Nepal garn frá Drops, sem er fyrir prjónastærð 5, en ráðlagði að nota prjóna 3,5 því húfan átti að verða mjög þétt. Ég hlýddi þessu, og prjónaði báðar húfurnar með harmkvælum, því þetta var varla gerandi. Mig verkjaði í hendurnar á því að prjóna eins fast og ég gat. Og húfurnar urðu alltof massífar og stórar.

Ég rakti þær upp og gerði legghlífar úr Nepal garninu, og prjónaði húfurnar svo aftur úr Lima frá Drops, sem er sama garn og Nepal en fínna, ætlað fyrir prjóna 4. Nú gekk þetta miklu betur, og húfurnar miklu eðlilegri fyrir litlu höfuðin.

Dúskana fékk ég í Gallerý Spuna í Kópavogi, þeir eru með smellu.

Uppskriftina er hægt að kaupa hér á norsku, en ég man ekki alveg hvar ég fékk þá íslensku.

föstudagur, 9. mars 2018

Útsaumur

Þessar myndir saumaði ég til að hengja upp í þvottahúsinu.
Ég keypti munstrið í Virku fyrir nokkrum árum, og eru myndirnar sjö alls, og myndefnið er heimilisstörf af ýmsu tagi á þeim öllum. 
Útsaumsgarnið er eldgamalt, arfur frá mömmu.
Í rauninni á að sauma þær á viskastykki.
Myndarammarnir eru ósamstæðir, en ég átti þá inni í skáp.

sunnudagur, 4. mars 2018

Hettupeysur, peysan Hvoll

Þetta er peysan Hvoll úr Lopa 37. 
Ég notaði Lamaull úr Litlu prjónabúðinni í staðinn fyrir léttlopa.
Í uppskriftinni er ekki gert ráð fyrir neinum frágangi innan á listanum, en ég tók upp lykkjur og prjónaði kant, sem ég saumaði svo niður.
Hettuna átti líka að prjóna í hring og klippa upp, en ég prjónaði hana fram og til baka, sem mér finnst miklu fallegra.

Svo er ég farin að merkja prjónaföt leikskólastelpnanna minna með svona taumiða.
Lengi var ég að spá í að kaupa tilbúna miða, en ákvað svo bara að gera þá sjálf.
Peysurar eru að sjálfsögðu á eldri ömmustelpurnar mínar tvær, sem eru tveggja og hálfs árs, en stærðin er á þriggja ára í uppskriftinni.

sunnudagur, 25. febrúar 2018

Húsateppi


Ég sá teppi einhvers staðar á netinu sem var miklu stærra en þetta, með svona húsum.

Mig hefur lengi langað til að gera svona húsablokkir þar sem klassísk blokk er sett á eina húshliðina.


Ég teiknaði því nokkur hús í EQ8 forritinu mínu, með uppáhalds blokkumum mínum, og saumaði með pappírssaumi.

Ég stakk aðallega í saumförin, en líka aðeins í kring.

miðvikudagur, 14. febrúar 2018

Föt á Baby Born


Ég tók mig til í vetur og saumaði nokkrar spjarir á dúkkur eldri ömmustelpnanna tveggja.

Ég var svolítið ánægð með mig þegar ég gat notað eingöngu afganga og gömul föt af sjálfri mér í verkið.

Sniðin eru héðan og þaðan, ég hef sankað þeim að mér í gegnum árin.

Allt tvöfalt, eins og venjulega😊

mánudagur, 29. janúar 2018

Hringskeri


Ég fékk svo skemmtilega jólagjöf frá syni mínum og fjölskyldu hans.
Ég vissi ekki að mig vantaði þetta af því að ég vissi ekki að það væri til, en þetta er hringskeri fyrir bútasaum.
Í gegnum árin hef ég notast við mismunandi diska og dósir til að gera hringi, en þessa græju er hægt að stilla nákvæmlega fyrir rétta stærð af hring.

Svo fylgdi með stika fyrir "Dresden Plate", en það er ein af mínum uppáhalds blokkum.

Upp úr kassanum kom líka pakki af Steam-A-Seam sem alltaf kemur sér vel að eiga í applíkeringuna.
Allt var þetta pantað frá Massdrop.

Ég prófaði græjurnar strax og gerði púða. 
Hringskerinn virkaði mjög vel og ég er svakalega ánægð með hann.

mánudagur, 15. janúar 2018

Heimferðarsett


Þetta heimferðarsett prjónaði ég á lítinn pilt sem von er á í heiminn í febrúar.

Uppskriftirnar eru að mestu úr Heimferðarsettablaði Prjónajónu, en hjálmhúfan er úr Babystrikk på pinde 3.
Svo bætti ég við lestarsokkum.

Garnið er Lanett frá Sandnes, og valdi móðirin þessa fallegu liti saman.